850 Numquam futilibus excanduit ignibus æther:
Squalidaque elusi deplorant arva coloni,
Et steriles inter sulcos defessus arator
Ad juga mœrentes cogit frustrata juvencos.
Aut gravibus morbis et lenta corpora tabe
Corripit exustis letalis flamma medullis
Labentisque rapit populos; totasque per urbes
Publica succensis peraguntur fata sepulcris.
Qualis Erechtheos pestis populata colonos
860 Extulit antiquas per funera pacis Athenas,
Alter in alterius labens cum fata ruebant.
Nec locus artis erat medicæ nec vota valebant;
Cesserat officium morbis; et funera deerant
Mortibus et lacrymæ; lassus defecerat ignis,
[Et coacervatis ardebant corpora membris:]
Ac tanto quondam populo vix contigit heres.
Talia significant lucentes sæpe cometæ;
Funera cum facibus veniunt, terrisque minantur
Ardentis sine fine rogos, cum mundus et ipsa
870 Ægrotet natura, novum sortita sepulcrum.
Quin et bella canunt ignes subitosque tumultus
Et clandestinis surgentia fraudibus arma:
Externas modo per gentes; ut fœdere rupto
Cum fera ductorem rapuit Germania Varum
Infecitque trium legionum sanguine campos:
Arserunt toto passim minitantia mundo
Lumina, et ipsa tulit bellum natura per ignes
Opposuitque suas vires finemque minata est.